Osian meilir

Yn hanu o Bentre’r Bryn ar arfordir gorllewin Cymru, mae Osian Meilir yn berfformiwr, coreograffydd ac artist symudiad llawrydd sy’n rhannu eu hamser rhwng Cymru a Llundain. Ers graddio o Trinity Laban yn 2017, bu eu gwaith yn teithio’n helaeth ar hyd a lled Cymru, y DU ac yn rhyngwladol, i gynnwys gŵyl Ten Days on the Island yn Awstralia (2023), Biennale de la Danse yn Lyon (2023) a World EXPO 2025 yn Osaka, Japan.

Mae gwaith Meilir fel perfformiwr yn cynnwys gweithio gydag artistiaid fel Jo Fong, Lizzi Kew Ross & Co, Fearghus Ó Conchúir, Satore Tech, Theatr Cymru a Chwmni Dawns Genedlaethol Cymru. Mae eu gwaith hefyd yn ehangu i fyd theatr ar gyfer cynulleidfaoedd ifanc drwy berfformio gwaith gan Carlos Pons Guerra a Cahoots NI, yn teithio ledled y DU ac yn rhyngwladol fel rhan o gynyrchiadau eu hun ac eraill. 

Fel coreograffydd, mae Meilir wedi cael ei gomisiynu i greu gwaith newydd gan Articulture Wales, Yr Eisteddfod Genedlaethol, Gŵyl y Dyn Gwyrdd a Chwmni Dawns Genedlaethol Cymru. Maen nhw eisoes yn cynhyrchu a chyfarwyddo gwaith personol eu hun gan gynnwys eu cynhyrchiad cyntaf Qwerin yn 2021 a dyfodd i lwyddiant ysgubol.

Mae Meilir hefyd yn cyfarwyddo symudiad a choreograffi ar gyfer sioeau cerdd a theatr, wedi gweithio gyda National Theatre Wales, Cwmni Frân Wen, Theatr Cymru a Chwmni Theatr Arad Goch ar gynyrchiadau amrywiol. Maen nhw hefyd yn hwylusydd profiadol sy’n gweithio gydag ystod eang o artistiaid, grwpiau cymunedol a sefydliadau ledled y wlad.

Mae profiadau cynharaf Meilir, a'u cefndir yn ymhél â'r ddawns werin Gymreig, wedi golygu bod Meilir yn gwerthfawrogi dawns o bob math o ddiwylliannau gwahanol. Mae hefyd wedi golygu eu bod yn cael mwynhad o ystyried y ffordd y gall dawns godi pontydd pwysig rhwng pobl o bob cwr o'r byd.